बा हामी नेपाली !

बा हामी नेपाली !
आजभोलि हामीले
बारी बाझै राखेका छौं
बारीमा तोरी छर्न छाडेका छौं
घैया छर्न छाडेका छौं
फापर छर्न छाडेका छौं
बारीमा मकै छर्न छाडेका छौं
कोदो रोप्न छाडेका छौं
बा हामी नेपाली !
आजभोलि हामीले
खेत बाझै राखेका छौं
खेतमा गहुँ छर्न छाडेका छौं
धान रोप्न छाडेका छौं
खोरिया खन्न त हामीले
धेरै पहिलेदेखि नै छोडेका हौंं
खेत बिराउन त हामीले
उहिलेदेनि नै छोडेका हौं
लेख औल गर्ने बानी त हाम्रो छुटिसक्यौ
गाई गोठ जाँदैनौं हामी
भैंसी गोठ जाँदैनौं हामी
भेंडी गोठ  जाँदैनौं हामी
वर्म पर्म लगाउन पर्दैन भो हामीलाई
मेलापात गर्न पर्दैन भो हामीलाई
दाउरा घाँस गर्न पर्दैन भो हामीलाई
मुखियाले सिरिरि सिटी लगाउँदा
स्याउ भिरेर
हुद्दामा सामेल हुन पर्दैन भो हामीलाई
डोको बोकेर
डोकामा       
खाने खर्चो बोकेर
बर्षभरिलाई
नून तेलको जोहो गर्न
ठाँटी पौवामा बास बस्दै
हप्तौं हप्ता हिंड्न पर्दैन भो हामीलाई
थाक भोट गर्न पर्दैन भो हामीलाई
बटौली झर्न पर्दैन भो हामीलाई 
हाम्रा आमा दिदी बहिनीहरूलाई
दैलो कुचो पनि गर्न पर्दैन भो एका बिहानै
पानी लिन गाग्री बोकेर
टाढै कतै
पानी पधेंरा धाउन पर्दैन भो एका विहानै
साँचो कुरा गर्ने हो भने
सात समन्द्रका मुलुकहरू नै
यतिबेला 
हाम्रा पानी पधेरा बनेका  छन् 
हाम्रा गन्तव्य थलो बनेका छन्
हाम्रा आकर्षणका केन्द्र बनेका छन्
हाम्रा सपनाका संसार बनेका छन्
मोहनी लगाएको छ हामीलाई विदेश कै माटोले
तानिरहेको छ हामीलाई विदेश कै  बाटोले
हलो जोत्न परे पनि हामी
सात समुन्द्र पारी पुगेर नै जोत्दछौं
खोक लगाउन परे पनि हामी
सात समुन्द्र पारी नै लगाउँछौं
बाँझो मार्न परे पनि हामी उतै बाझौ मार्दछौं
डल्ला फोर्न परे पनि हामी उतै ढल्ला फोर्छौं
आली कान्ला काट्न परे पनि हामी उतै आली कान्ला काट्छौं
मल बोक्न परे पनि  हामी  उतै मल बोक्छौ
मल फाल्न परे पनि उतै फाल्छौं हामी
बिहु उतै छर्छौं हामी
ब्याड उतै राख्छौं
धान कोदो उतै रोप्छौं हामी
रोपाइं उतै गर्दछौं
मानो  खाई मुरी उतै उब्जाउँछौं  हामी
धान उतै काट्छौं
धान उतै झाट्छौं हामी
कोदो उतै काट्छौं
कोदो उतै ठटाउँछौं  हामी
भकारी उतै भर्छौं 
इरिम धन्सार उतै चुलाउँछौं हामी
मकै उतै भाँच्छौं 
झोंता उतै पार्छौं हामी
सुली उतै लगाउँछौं
लुगा सिलाउन परे
उतै सिलाउँछौं हामी
टेलर मास्टर बन्न परे पनि  हामी उतै बन्छौं
ड्रेस डिजाइनर बन्न परे पनि हामी उतै बन्छांै
जुता सिलाउन परे पनि हामी उतै सिलाउँछौं
घन ठोक्न परे पनि उतै ठोक्छौं
बन फाड्न परे पनि उतै फाड्छौ
आरा लाउन परे पनि उतै लगाउँछौं हामी
भाँडा माज्न परे पनि उतै माज्छौं
लुगा धुन परे पनि उतै धुन्छौं हामी
बाटो  खन्न परे उतै खन्छौं
बा हामी नेपाली
नेपाल गर्दै खाली
सात समुन्द्रपारिभरि सलह जस्तै छाइएका छौं
विश्वको जुनसुकै कुनामा पनि हामी पाइएका छौं
कति हाम्रा हलीहरू होलेण्डमा हलो जोतिरहेका छन्
कति हाम्रा डोलेहरू डब्लिनमा डल्ला फोरिरहेका छन्
कति हाम्रा पाखेहरू पेरिसमा पंडित बनिरहेका छन्
कति हाम्रा जलेरीहरू जर्मनीमा जाल खेलिरहेका छन्
कति हाम्रा बाउसेहरू बेलायतमा बन्दुक बोकिरहेका छन्
कति हाम्रा रोपाहाहरू रुसमा रोटी बेलिरहेका छन्
कति हाम्रा गोठालाहरू गल्फ मुलुकमा गाडी गुडाइरहेका छन्
कति हाम्रा खेतालाहरू खाडीमा खानी खरिरहेका छन्
कति हाम्रा खेतारीहरू साउदीमा सेफका सुसारे बनिरहेका छन्
कति हाम्रा बहादुरहरू बकदादमा गोराहरूका आठ पहरिया भइरहेका छन्
कति हाम्रा भरियाहरू भेनिसमा भारी बोकिरहेका छन्
कति हाम्रा कर्मीहरू काबुलमा कालीगडी गरिहेका छन्
कति हाम्रा कटुवालहरू कतारका कम्पनीमा कामदार                                                बनिरहेका छन्
कति हाम्रा किसानहरू कोरियाका कारखानामा कपास कातिरहेका छन्
कति हाम्रा मजदुरहरू मलेशियामा माछा मारिरहेका छन्
विदेशीहरू स्वदेशभित्र ओइरिने र स्वदेशीहरू विदेशभरि  छरिने सिलसिला जारी छ
हाम्रो सरकारको उदार नीति हो
नेपाली नागरिकलाई राहदानीको राहत
विदेशी नागरिकलाई नेपाली नागरिकताको प्रमाणपत्रले स्वागत
हाम्रा बारी बाँझै रहेर के भो
सिरु त्यहाँ उम्रिरहेकै छ
हाम्रा खेत फाँट बाँझै रहेर के भो
गमनचुम्बी महलहरू त्यहाँ उम्रिरहेछन्
कंक्रिट बिल्डिङहहरू त्यहाँ फुलिरहेछन्
कंक्रिट बिल्डिङहरू त्यहाँ फलिरहेछन्
कंक्रिट बिल्डिङहरू त्यहाँ झुलिरहेछन् 
प्लटिङमा परेका प्लटहरू पलेंटी कसेर बसेका छन्
थप विकास निर्माणको लागि
यही त हो देशको विकास
आर्थिक विकास
कसैलाइै कत्ति पनि नपरोस् भ्रान्ति
राजनैतिक क्रान्ति पुरा भए पछि
यही त हो देशको आर्थिक क्रान्ति
ओम शान्ति
ओम शान्ति
ओम शान्ति
बा हाम्रो नेपाल
बा हामी नेपाली ।

२७–७–२०७४