बेचिएको कलम

भन्छन् कलम तलबारभन्दा धेरै शक्तिशाली हुन्छ
तलबारले ढाल्न नसकेको दरबार कलमले ढाल्छ
अस्वीकार गर्दिनं म यस उक्तिलाई
अविश्वास गर्दिनं म यस अभिव्यक्तिलाई
कलम भनेको कलम नै हो
कलममा जति दम हुन्छ त्यति तलवारमा कहाँ हुन सक्छ
कलम तलबारभन्दा हजारौं गुना बढी शक्तिशाली हुन्छ
मार हान्न सक्छ कलम धरतीको एउटा कुृनादेखि अर्को कुनासम्म
तल पातालदेखि माथि आकाशसम्म्
बिगतदेखि बर्तमानसम्म
बर्तमानदेखि भविष्यसम्म
विश्वदेखि ब्रह्माण्डसम्म
शायद यही भएर होला हिटलर पनि कलमको अघि थरिकम हुन्छ
चंंगेज खाँको घोडाको टाप पनि कलमको पदचापले टक्क रोकिन्छ
कलम फुलबारीमा सुन्दर फूल भएर फुले पनि
कलम खेतबारीका गहुँका बाला भएर झुले पनि
युद्धभूमिमा बम भएर बिष्फोट पनि हुृन सक्छ कलम
क्षेप्यास्त्र भएर धरतीका पल्ला टुप्पासम्म पनि मार हान्न सक्छ कलम
शायद यही भएर होला यतिबेला खुला बजारमा
बेचिन्छ कलम पनि
किनिन्छ कलम पनि
हाताहात बिक्छ कलम हाट बजारमा
हट केक भएको छ कलम यतिबेला सुपर मार्केटमा
शायद यही भएर पनि होला
कलमको खरीद बिक्रीको ग्राफ निकै माथि उठेको छ
मालामाल भएका छन् यतिबेला कलमका व्यापारीहरू
कलमका कारबारीहरू
सौदागरहरू
सौदावाजी हुन्छ कलमको
मोलतोल हुन्छ कलमको
बोल कबोल हुन्छ कलमको
लिलाम हुन्छ कलमको
यत्ति हो
कलम कसले बेच्यो थाहा हुँदैन दुनियाँलाई
कलम कसले किन्यो थाहा हुँदैन दुनियाँलाई
सुन तस्करी कसले गरिरहेछ बरु थाहा होला सरकारलाई
लागु पदार्थको ओसार पसार कसले गरिरहेछ बरु थाहा होला प्रशासनलाई
मानव बेच बिखनमा को को संलग्न छ  बरु थाहा होला पुलिसलाई
तर कलमको किनबेच थाहा हुँदैन कसैलाई
अत्तोपत्तो हुँदैन कसैलाई
सुइंकोसम्म पाउना सक्दैन कोही
संसदले राष्ट्रघाती सन्धि समझौता जति मध्यरातमा पास गरे पनि
थाहा हुन्छ दुनियाँलाई
सरकारले पातालमा पुगेर आत्मघाती गोप्य सन्धि समझौता गरे पनि थाहा हुन्छ सारा दुनियाँलाई
तर कतै कुनै रातको अँध्यारो कुनामा बसेर गरिने कलमको खरीद बिक्री थाहा हुन सक्दैन कसैलाई
कलमको खरीद बिक्रीको लिखत कस्तो छ थाहा हुँदैन कसैलाई
कलमका खरीद बिक्रीका शर्त के के हुन थाहा हुँदैन कसैलाई
यहाँसम्म कि कुनै कलम बिक्रीमा छ कि बिक्री भइसक्यो थाहा हुँदैन कसैलाई
आखिर थाहा हुने कुरो पनि होइन यो
आखिर ढोल पिटेर हल्ला गर्ने कुरो पनि होइन यो
तैं चुप मै चुपको व्यापार हो यो
गुपचुप गरिने कारोबार हो यो
तर पनि धुँवा निस्के पछि आगोको उपस्थिति थाहा भए जस्तै
पानी परे पछि बादलको उपस्थिति थाहा भए जस्तै
पात हल्ले पछि हावाको उपस्थिति थाहा भए जस्तै
बेचिएको कलमको अक्षर बांगिए पछि
बेचिएको कलमको अक्षर नांगिए पछि
बेचिएको कलमको स्वर फेरिए पछि
बेचिएको कलमको धार  भुत्ते भए पछि
त्यसका झलकहरू त कतै कतै मंचित हुने नै भए
त्यसका छनकहरू त कतै न कतै तरंगित हुने नै भए
त्यसका लक्षणहरू त कतै न कतै प्रदर्शित हुने नै भए
त्यसका किरणहरू कतै न कतै बिकेन्द्रित हुने नै भए
कहाँ आगो खाएर अंगार उगेल्न सक्छ बेचिएको कलम   
कहाँ बिष्फोट भएर संसार हल्लाउन सक्छ बेचिएको कलम
कहाँ उथल पुथल र क्रान्तिका गीत गाउन सक्छ बेचिएको कलम
कहाँ स्वाधीनता र स्वतन्त्रताको संगीत गुन गुनाउन सक्छ बेचिएको कलम
कहाँ देशभक्तिको धृुन बजाउन सक्छ बेचिएको कलम
जिउँदो एउटा लाश भएर बाँचेको हुन्छ बेचिएको कलम
खालि एउटा त्रास भएर बाँचेको हुन्छ बेचिएको कलम
बेचिएको कलमको खास पहिचान त हो मौनता
केबल मौनता
मौनता यस अर्थमा पनि कि
बेचिएको कलम बोल्दा पनि वास्तवमा केही बोलिरहेकै हुँदैन ।
२९–३–०७४