घुम्टे

बिहान उज्यालो हुँदै जाँदा
घामको रातो घुम्टो ओढ्छ घुम्टे
बेलुकी सांँझ पर्दै जाँदा
घामको पहेलों घुम्टो ओढ्छ घुम्टे
समयको सूचक हो घुम्टे
घण्टाघर हो घुम्टे
बर्खा लाग्दा
आकाश गर्जिदा
बिजुली चम्किंदा
बादलको कालो घुम्टो ओढ्छ घुम्टे
पुष माघको महिनामा
चीसो सिरेटो चल्दा
हिउँको सेतो घुम्टो ओढ्छ घुम्टे
टाढा टाढाबाट हेर्दा
जति नांगो नांगो जस्तो देखिए पनि आखिर
गुराँसहरूको फूलवारी हो घुम्टे
जडीबुटीहरूको भण्डार हो घुम्टे
बनस्पतिहरूको उद्यान हो घुम्टे
बन्य जन्तुहरूको बास हो घुम्टे
चरा चुरुंगीहरूको निवास हो घुम्टे
अथाह ऐश्वर्यको खानी हो घुम्टे
देवी देवताहरूको धाम हो घुम्टे
सिद्धहरूको कैलाश हो घुम्टे
साधु सन्त महन्तहरूको
आश्रम हो घुम्टे
प्रभूहरूको
तपभूमि हो घुम्टे
बुद्ध पूर्णिमाको
पवित्र बिहार हो घुम्टे
पर्यटकहरूको
हिमाल पहाड तराई अवलोकन गर्ने
भ्यू प्वाइन्ट हो घुम्टे
गल्कोटको शान
गल्कोटको पहिचान
गल्कोटको धरहरा हो घुम्टे
गल्कोटको सगरमाथा हो घुम्टे
इतिहास बोकेको आदिमकालदेखि
हाम्रा पुर्खाहरूको
शिला स्तम्भ हो घुम्टे
पारि बराहसित
पर्दा टक्कर ठूलो
घुँडा धसेर धरतीमा भीमले
वारिबाट पारि फाल्दा
अजङको ठेलो
माथि आकाशमा उठेको
गल्कोटको प्राण
गल्कोटको त्राण
देश कै गौरव गाथा हो घुम्टे ।
४–११–०७०
१६–२–०१४