बेथितिको यो देशमा

बेथितिको यो देशमा
थिति बसाल्नै गाह्रो
थिति थिति भए पो थिति बस्छ
थिति नै बेथिति भए पछि कहाँ थिति बस्छ
कुनै जंगे जन्मेको छैन यो देशमा थिति बसाल्न
जति जंगे जन्मे
सबै अक्षम भए र गए थिति बसाल्न
यो बेथितिको देशमा
एउटा थितिलाई उखेलेर फाल्छन्
हाम्रा जंगेहरू
विदेशीले जंगे पिलर उखेलेर कतै फाले जस्तै
एउटा थितिलाई गोडेर फाल्छन्
हाम्रा जंगेहरू
किसानले बाक्ला मकै गोडेर कतै फाले जस्तै

जमाएँं त भन्छन्
नयाँ नयाँ बिज विजनहरू थितिका जंगेहरू
रोपें त भन्छन्
नयाँ नयाँ बोट बिरुवाहरू थितिका जंगेहरू
बाँझो पाखा पखेरामा
नांगो डाँडा काँडामा 
टुसाउँछन् बेथितिका बिरुवाहरू भरर बर्षे च्याउ जस्तै
हुर्किन्छन् विथितिका बोट बिरुवाहरू सलल बनमारा जस्तै
यो मुलुक हिजो पनि बेथितिले हाँकेको थियो जबरजस्ती
आज पनि बेथितिले नै हाँकेको छ जबरजस्ती
थिति बसाल्ने मान्छे नै बेथितिको सरदार भए पछि
कहाँ बस्छ थिति यो मुलुकमा
थिति बसाल्ने जंगे त जन्मेकै छैन यो मुलुकमा
थिति बसाल्छु भन्ने जंगेको थिति त हामीले
गरेर घोषित बेथिति
बल्ल बल्ल भत्कायौं
तर
न त थिति बसाल्छु भन्ने बेथितिको जननी जंगेलाई नै भत्काउन  सक्यौं
न त थितिको जामामा जन्मेको बेथितिलाई नै फाल्न सक्यौं
शायद मुलुक सतत कुराइमा छ 
एउटा क्रान्ति थितिको
बेथितिको यो देशमा ।
२२–९–०७४