बतुराएको त्यो मान्छे

हिजो ठूलो क्रान्ति  गर्दछु भन्दथ्यो त्यो मान्छे
क्रान्तिको रथ हाँक्दछु भन्दथ्यो त्यो  मान्छे
अग्र पंक्तिमा खडा हुन्छु भन्दथ्यो बर्ग संघर्षको मोर्चामा त्यो मान्छे
मुक्ति कि मृत्यु भन्दै  युद्धको मैदानमा हाम्फाल्दछु भन्दथ्यो त्यो मान्छे
सगरमाथाको शिखरमा लाल झण्डा फहराउँछु भन्दथ्यो त्यो मान्छे
सपना त धेरै देखेको थियो त्यस मान्छेले
सपना त धेरै देखाएको थियो त्यस मान्छेले
पुरानो मुलुकको नक्शा च्यातेर
नयाँ मुलुकको नक्शा कोर्दछु भन्दथ्यो त्यो मान्छे
मुक्ति क्षेत्र घोषित गर्दछु भन्दथ्यो सम्पूर्ण भूगोललाई त्यो मान्छे
फेर्दछु भन्दथ्यो सम्पूर्ण इतिहासलाई नै त्यो मान्छे
संसार नै फेर्दछु भन्ने त्यो मान्छे
आखिर कति छिटै आफै फेरिएछ 
कति छिटै फेरेछ क्याम्प उसले
कति छिटै बदलेछ बाटो उसले 
कति छिटै बिर्सिएछ आफ्ना सारा बाचा कबुल उसले
कति छिटै विर्सिएछ शहीदहरूको सपना उसले
कति छिर्टै विर्सिएछ घाइते सहयोद्धाहरूको पीडा उसले
कति सजिलै विर्सिएछ पीििडत परिवारको व्यथा उसले
कति सजिलै लगाएछ उसले प्रतिक्रान्तिसित मित
पचाएर सबै लाज
जनबैरीहरूसित मिलाएर हात 
जनबैरीहरूको पाएर  पुरै साथ
आज आफै जनक्रान्तिको घोर विरोधी बनेको छ त्यो मान्छे
आज  क्रान्ति हुन  दिन्न  म भन्दछ  त्यो मान्छे
क्रान्तिको बिरुवा उखेल्दछु  भन्दछ
क्रान्तिको बिउ मास्दुछ भन्दछ
क्रान्तिको घाँटी निमोठ्दछु भन्दछ
क्रान्तिको आगो निभाउँदछु भन्दछ
क्रान्तिको आँधी तुफान रोक्दछु भन्दछ
क्रान्तिको बाटो छेक्दछु भन्दछ
क्रान्तिको बाटो रोक्दछु भन्दछ
क्रान्तिलाई बाटो छेक्न
पहाड भएर उभिन्छु भन्दछ
गोली भएर बर्सिन्छु भन्दछ
बम भएर पडकिन्छु भन्दछ
रौद्र रुप  धारण गरेर
ताण्डव नृत्य गर्दछु भन्दछ
बाबै गाँजा धतुरो खाएर पो हो कि
जाँड रक्सीको मात लाएर हो
बतुराएर हिंडिरहेको छ त्यो मान्छे आज
के के बक्दै हिडिरहेको छ त्यो मान्छे आज
बाटाघाटामा
हाट बजारमा
गल्ली गल्लीमा
चोक चोकमा

२६–१२–२०७४