कमरेडको लीला

हिजो कमरेडलाई बैरीले लखेट्दा शहरमा
गाउँमा सेल्टर दिने हर्के बिर्खेको हालत के छ थाहा छैन
तर आज कमरेडका पाइला दैनिन्दिन समृद्धितिर अग्रसर हुँदै छन्
देश समृद्धितिर पुग्छ पुग्दैन थाहा छैन
तर कमरेडले समृद्धिको सगरमाथा अवश्य चुम्दै छन्
तुनेका जडौरी चप्पल भिरेर उकालो ओरालो गर्दथे कमरेड हिजो गाउँ  घरतिर
आज  रोजी रोजी महंगा चिल्ला कारमा चढेर सबारी हुन्छन् कमरेड शहर बजारतिर
हिजो बुर्जुवा शिक्षा बहिस्कार भन्दथे कमरेड
आज बुर्जुवाहरूकै  लागि विश्व विद्यालय खोल्दै हिंडका छन् कमरेड
हिजो क्रान्तिका नारा घन्काएर कहिले थाक्दैनथे कमरेड
आज शान्तिको माला जप्दै हिंड्न थालेका छन्
हिजो दरबारलाई निशाना बनाउँदै बम बिष्फाट गर्ने कुृरा गर्दथे कमरेड
आज आफै गगनचुम्बी दरबार बनाएर बस्न थालेका छन्
दरबारमा बस्ने राजा कहाँ बस्दछन् आज थाहा छैन
तर  कमरेड आफै दरबारमा बस्न थालेका छन्
ःश्रीपेच छैन कमरेडका शिरमा त के भो
उनको रहन सहन ठाँटबाट कुनै राजा महाराजाकोभन्दा कत्ति कम छैन
मुलुकमा राजतन्त्र छैन त के भो
गणतन्त्र आएको आभास कसैलाई हुन सकेको छैन
पारिवारिक शासन छैन मुलुकमा  त के भो
परिवारका मान्छेको सात पुस्ताको जो हो भएकै छ
देश परिवर्तन नभएर के भो
कमरेड  त परिवर्तन भएकै छन्
हिजो के थिए कमरेड
आज के भएका छन्
हिजो लुक्दै हिंड्दथे कमरेड
आज भुक्दै हिंड्न थालेका छन्
हिजो आफूले बोकेको सिद्धान्त ड्रप गरे त के भो कमरेडले
झण्डा त उही बोकेकै छन्
आज काम कमरेडको फेरिएर के भो
नाम त उही चलाएका छन्
हिजो पनि कमरेड कमरेड थिए
आज पनि कमरेड कमरेड नै रहेका छन्
धन्दा जति फेरे पनि कमरेडले
झण्डा त फेरेका छैनन्
बर्ग संघर्ष छोडे पनि कमरेडले
बर्ग छोडेका छैनन्
हिजो तल्लो बर्गमा पर्दथे कमरेड
आज उपल्लो बर्गमा पदोन्नति भएका छन्
कमनिष्टको राज नआए पनि यो मुलुकमा
कमनिष्ट कै नाममा कमरेडले राज गरेका छन्
हिजो संघर्षको बाटो समातेका थिए कमरेडले
आज संघर्षको बाटो  भत्काउन थालेका छन्
हिजो जेल फोर्दै हिड्दथे कमरेड
आज जेल भर्दैै हिंड्न थालेका छन्
साँचो कुृरा गर्ने हो भने
सिंगो देशलाई नै कमरेड एउटा जेल बनाउन थालेका छन्
बन्दुकको नालबाट राज्य सत्ताको उदय हुन्छ भन्ने कुरामा कुनै विश्वास नभए पनि कमरेडको
बन्दुकै बलमा आफ्नो कुर्सी सुरक्षित हुने कुरामा विश्वास बलियो बन्दै गएको छ
अहिले अभ्यास त्यसैको छ
अहिले प्रयास त्यसैको छ
हिजो विदेशी प्रभुका अगाडि भुक्दै झुक्दिन भन्ने कमरेड
आज उसकै अगाडि लम्पसार पर्न थालेका छन्
मुलुकलाई जति क्षति पुराएर भए पनि
उसकै सति जान थालेका छन्
मान्छेले गल्ती गरे पनि
कमरेडले कहिले गल्ती गर्दैनन्
हिजो पनि कुनै गल्ती गरेका थिएनन् कमरेडले
आज पनि कुनै गल्ती गरेका छैनन्
हिजो पनि ठीक थिए कमरेड
आज पनि ठीक छन्
कमरेड कमरेड हुन्
कमरेड कहिले बेठीक भएका थिए र
आज बेठीक हउन्
कमरेड ठीक शब्दका प्रयायवाची हुन् ।
२७–३–२ं०७५