जंगे पिलर २

जंगे पिलर त गायब गरेका थिए डाँकाहरूले
त्यहाँ पनि
यता उता त्यता जस्तै
मध्यरातमा
निल्नलाई मातृभूमिको माटो
हडप्नलाई सीमावारिको भूभाग
विस्तार गर्न आफ्नो साम्राज्य
अमर शहीद गोविन्द गौतम
तिमी आफै जंगे पिलर भएर खडा भयो 
तिमी आफै भक्ति थापा भएर खडा भयो
तिमी आफै भीमदत्त पंत भएर खडा भयो
तिमी आफै देशको सिपाही भएर खडा भयो
तिमी आफै देशको बीर योद्धा भएर खडा भयो
तिमी आफै देशको सपुत भएर खडा भयो
सीमाको सुरक्षा गर्न
मातृभूमिको रक्षा गर्न
आफ्नो माटोको हिफाजत गर्न
सह्य भएन तिम्रो देशभक्ति
अतिक्रमणकारी आक्रंंमणकारीहरूलाई
सह्य भएन तिम्रो प्रतिरोध
विस्तारवादी शैतानहरूलाई
र दागे गोली दुश्मनहरूले
तिम्रा छातीमा र ढाले
अर्को भक्ति थापा
अर्को भीमदत्त पंत
अर्को जंगे पिलर
सीमामा हिमाल जस्तै अडिग खडा
जंगे पिलर
दुश्मनले एउटा जंगे पिलर ढाले पनि
लाखौं लाख जंगे पिलर
लाइन लाएर खडा छन्
सीमाना सीमानामा
गौडा गौडामा
मातृभुमिको पहरेदारी गर्न
मातुभूमिको सुरक्षा गर्न
चुप लागेृर बस्न सक्दछ मुर्दाहरूको संसद यो देशमा
चूप लागेर बस्न सक्दछ मुर्दाहरूको सरकार यो देशमा
चुप लागेर बस्न सक्दछ लेन्डुप दोर्जेहरूको अबतार यो देशमा
तर जंगे पिलर सीमा सीमामा पंक्तिबद्ध भएर खडा हुन्छ
दिन रात जागाराम रहन्छ
आफू ढल्न परे पनि
आततायी आक्रमणकारीहरूको  गोली खाएर 
ढल्न दिन्न गोर्खालीहरूको गौरव
ढल्न दिन्न सगरमाथाको उच्च शिर
गुम्न दिन्न देशको स्वतन्त्रता
गुम्न दिन्न देशको भूगोल
मेट्न दिन्न पुरखाहरूको वीरताको स्वर्णीम इतिहास
लाश हुन तयार छ बीरहरूको यो देश
तर दास हुन तयार छैन
गुलाम भएको होला अतिक्रमणकारीहरूको देश बरु

गुलाम भएका होलान् कति विशाल साम्राज्यहरू पनि कुनै दिन
गुलाम भएका होलान् होलान् कति महादेशहरू पनि कुनै दिन
गुलाम भएका होलान् कति महाशक्तिहरू पनि कुनै दिन
इतिहास साक्षी छ
यो मुलुक कहिले गुलाम भएन
यो मुलुक कहिले गुलाम हुने पनि छैन
यस कारणले पनि कि
यो मुलुक बीर बलभद्रहरूको मुलुक हो
यो मुलुक उजीरसिंहहरूको मुलुक हो
यो मुलुक भक्ति थापाहरूको मुलुक हो
यो मुलुक भीमदत्त पंतहरूको मुलुक हो
यो मुलुक अमर शहीद गोविन्द गौतमहरूको मुलुक हो
त्यस्ता गोविन्द गौतमहरू
जो लाश हुन तयार छन्
तर दास हुन तयार छैनन्
त्यस्ता गोविन्द गौतमहरू
जो गायब गरिए पनि डाँका लाएर
जो ढल्न परे पनि दुश्मनहरूको गोली खाएर
सीमा क्षेत्रहरूमा
असंख्य जंगे पिलर भएर खडा छन्
अडिग हिमाल जस्तै
यो मुलुक त्यस्ता गोविन्द गौतमहरूको हो
जसको नाम उच्चाहरण गर्नासाथ
हाम्रो  छाती गर्वले फुल्दछ
हाम्रो शीर श्रद्धाले झुक्दछ
यो मुलुक त्यस्ता गोविन्द गौतमहरूको मुलुक हो
जो झरेर पनि यो धरतीमा सधैं फुलिरहन्छ
जो अस्ताएर पनि यो आकाशमा सधै झुल्किरहन्छ
जो मरेर पनि यो देशको सीमानामा सधैं बाँचिरहन्छ
जो ढले पनि सीमामा गोली खाएर
लाखौं लाख जंंगे पिलर भएर खडा रहिरहन्छ ।

२७–११–ण् ०७३
१०–३–२०१७
..