शत्रु

विदेशी शत्रुहरूका धाबाबाट त बरु                                                                     

बचाउन सकिएला यो देश 

स्वदेश कै शत्रुहरूको धावाबाट बचाउन  गाह्रो छ 

कोरोनाको. भाइरस जस्तै अदृश्य हुन सक्दछन् 

स्वदेशी शत्रुहरू

झलनाथले पाल्न थालेका सर्प जस्तै विषालु हुन सक्छन्

स्वदेशी शत्रुहरू 

ओली सरकारले पास गर्न खोजेका एमसीसी जस्तै खतरनाक हुन सक्छन्                         

स्वदेशी शत्रुहरू

लेन्डुप दोर्जे जस्तै गद्दार हुन सक्दछन्  

स्वदेशी शत्रुहरू

धमिराले जस्तै खोक्रो पारिसकेका छन् देश यिनीहरूले

असिनाले जस्तै सिक्रो  पारिसकेका छन् देश यिनीहरूले 

सलहले जस्तै नांगो पारिसकेका छन् देश यिनीहरूले 

घरका डाँडा भाटा पनि बेचेर खाइसकेका छन् यिनीहरूले 

देशका भाँडा कुँडा पनि बेचेर खाइसकेका छन् यिनीहरूले

देशका ढृंगा माटा पनि बेचेर खाइसकेका छन् यिनीहरूले 

देशका नदी नाला

प्राकृतिक सम्पदा

कल कारखाना 

खोई के बाँकी राखेका छन् यिनीहरूले 

जे जे हात लाग्छ उडाउँदै गइरहेका  छन्

जहाँ जहाँ  पाइला पर्छ डुवाउँदै गइरहेका छन् 

बन्न त बने होलान्  उनी आफूहरू

रंकदेखि राजासम्म 

पुग्न त  पुगे होलान् उनी आफूहरू

फुटपाथदेखि दरबारसम्म 

थुपार्र्न त थुपारेका होलान् उनी आफूहरू   

सात  पुस्ताले दार्इं हालेर पनि नसकिने धन सम्पतिहरू

यिनीहरूको चर्तीकला दुनियाँलाई थाहा नभएको त अवश्य होइन होला

यिनीहरूको पोल दुनियाँमा नखुलेको त अवश्य होइन होला 

यिनीहरूका कुकृत्य कसैको आँखामा नपरेको त अवश्य होइन होला 

फेरि पनि के गर्नुृ

यतिबेला यिनीहरू कै राज छ 

यिनीहरू कै शिरमाथि ताज छ 

जबसम्म यिनीहरूको राज रहिरहन्छ 

जबसम्म यिनीहरूका शिरमाथि  ताज रहिरहन्छ

यहाँ यस्तै भइरहन्छ

यहाँ यस्तै चलिरहन्छ ।

२२–५–२०२०