स्वीकारोक्ति

 

संसदीय फोहोरी खेलको आहालमा 

कुर्सीको लुछाचुँडीमा

कुर्सीको लडाईमा

नढाँटी भन्ने हो भने कमरेड

तिमीले हारे हुन्थ्यो भन्ने नै चाहन्थें म

तर पनि तिमीले जित्यौ

मेरो इच्छा विपरीत

बधाइ छ 

मलाई थाहा थियो जसले जिते पनि

कुनै दूधमा नुहाएको मान्छेले त जित्ने थिएन 

जसले जिते पनि यहाँ कुनै ठूलो उथलपुथल हुने त थिएन

कुर्सीको लुछाचुँडीमा

कुर्सीको लडाईमा

मलाई थाहा नभएको कुरा त अवश्य होइन यो 

दलालीमा टिकेको संसदीय राजनीतिको खेलमा                                          

जित्ने भनेकै एउटा दलालको सट्टा

कुनेै अर्को दलाल नै हो 

फेरि पनि 

एउटा दलालभन्दा अर्को दलाल केही फरक हृुन्छ कि भन्ने सोंच त आखिर हुने नै भयो                                        

एउटा दलालले भन्दा अर्को दलालले केही कम हानि नोक्सानी गर्दछ कि भन्ने सोंच त राख्नै पर्ने भयो

जे होस् कमरेड

मैले साहसपूर्वक भन्नै पर्दछ 

मैले मेरो स्वीकारोक्ति प्रकट गर्नै पर्दछ

म तिम्रो बिजयमा तिम्रा भक्तजनले जस्तै

खुशीयाली मनाउन सक्दिनं

म तिम्रा दिवाना अनुयायीहरू जस्तै

तिम्रो हर्ष बडाइमा सामेल हुन सक्दिन  ं 

यस कारण कि मलाई राम्ररी थाहा छ 

तिम्रो हरेक जीतमा देश हारेको छ 

जनता हारेका छन् 

आदर्श हारेको छ

मूल्य र मान्यता हारेको छ

नीति नियम र ऐन कानून हारेको छ

सिद्धान्त हारेको छ्

लक्ष्य हारेको छ््

अग्रगामी परिवर्तन हारेको छ्

मुक्ति शान्ति र प्रगतिको सपना हारेको छ

हिजो खुदै तिमीले पनि शुरु गरेको  

महान् सर्वहारा क्रान्ति हारेको छ ।

२–२–२०७८

१६–५–२०२१