यात्रामा प्रस्थान गर्दा
अगाडिको बाटो बन्द देखेर
किन हिक्मत हार्दछौ यात्री
किन हतोत्साहित हुन्छौ यात्री
केवल तिमीमा साहस हुनु पर्दछ
केवल तिमीमा आँट हुनु पर्दछ
संसारमा लाखौं लाख बाटाहरू छन् यात्राका
एउटा बाटो बन्द भए अर्को बाटो खुल्दछ
एउटा दिशा गलत भए अर्को दिशातिर मोडिनु पर्दछ
यात्रा त निरन्तर जारी राख्नु पर्दछ
पूर्णविराम लाग्न दिनु हुन्न आफ्नो यात्रामा
ओझेलमा पर्न हुँदैन आफ्नो यात्रालाई
हिम्मत हारेर पछि हटियो भने
निराश भएर यात्रालाई विश्राम दिइयो भने
कोही कहीं पुग्न सक्दैन
यात्रा निरन्तर जारी राखिरहने कुरा हो
यात्रा गन्तव्यमा पुग्नलाई हो
यात्रा निरन्तर जारी नराखेको भए
तेन्जिङ सगरमाथाको शिखरमा पुग्ने थिएनन्
यात्रा निरन्तर जारी नराखेको भए
बास्को डि गामाले इन्डिया पता लगाउन सक्ने थिएनन्
यात्रा निरज्तर जारी नराखेको भए
कोलम्बसले अमेरिकाको खोज गर्न सक्ने थिएनन्
यात्रा निरन्तर जारी नराखेको भए
नील आर्म स्ट्रन्गले चन्द्रमा पाइला टेक्न सक्ने थिएनन्
यात्रा जारी नराखेको भए सोक्रेटिज सोक्रेटिज हुन सक्दैनथे
यात्रा जारी नराखेको प्लेटो प्लेटो हुन सक्दैनथे
एरिस्टोटल एरिस्टोटल हुन सक्दैनथे
आइन्टाइन आइन्टाएन हुन सक्दैनथे
यात्रा जारी नराखेको भए
मार्क्स मार्क्स हुन सक्दैनथे
लेनिन लेनिन हुन सम्दैनथे
माओ माओ हुन सक्दैनथे
यात्राको बाटो सरल रेखा जस्तो सजिलो कहाँ हुन्छ र
बांगो टिंगो हुन्छ
कहाली लाग्दो छांगो हुन्छ
उकालो ओरालो भिरालो हुन्छ
पहाड पर्वत हुन्छ
डाँडा काँडा हुन्छ
भिर पाखा हुन्छ
खोला नाला हुन्छ
एक पछि अर्को चुनौतीले पच्छाइराखेको हुन्छ
फेरि पनि यात्रीले
हरेक चुनौतीको सामना गर्दै
बिघ्न बाँधालाई पार गर्दै
हिम्मत जुटाउँदै
आवश्यक परे बाटो बदलिंदै भए पनि
यात्रालाई फलदायी निष्कर्षमा पुराउने लक्ष्य लिनै पर्दछ
सफलताको थालेको यात्राले
विफलता पनि बेहोर्नु पर्ने हुन सक्दछ
फेरि पनि
हरेक विफलतालाई सफलतामा अनुवाद गर्ने अठोटलाई
हुँदैन दिन अलिकति पनि कमजोर हुन
साहससाथ अघि बढ्नु पर्दछ
साहसीले नै संसार हल्लाउन सक्दछ
साहसीले नै संसार फेर्न सक्दछ ।
१९-७-२०८०
५-११-२०२३
Comments
Post a Comment